ឃាត់រថយន្តបានចំនួន ១៩គ្រឿង ដកហូតស៊ីផ្លេខ្យល់ ៩ដើម នៅលើបណ្តោយផ្លូវជាតិលេខ២១ និងផ្លូវលេខ ១២១០

ខេត្តកណ្ដាល៖ បន្ទាប់ពីទទួលបានព័ត៌មានពីប្រជាពលរដ្ឋ លោកឧត្តមសេនីយ៍ទោ ឈឿន សុចិត្ត
ស្នងការនៃស្នងការដ្ឋាននគរបាលខេត្តកណ្តាល បានចាត់ឲ្យការិយាល័យនគរបាលចរាចរណ៍ផ្លូវគោក សហការជាមួយជំនាញផ្នែកសណ្តាប់ធ្នាប់ នៃអធិការដ្ឋាននគរបាលស្រុកស្អាង ចុះស្រាវជ្រាវ ចំពោះករណី ដែលប្រជាពលរដ្ឋបានរាយការណ៍ថា៖ មានឡានដឹកដីភ្នំជាច្រើន ស៊ីផ្លេឮខ្លាំងៗ បើកលឿនៗ ដូចហោះ មិនគោរពសិទ្ធិអ្នកបើកបរដទៃ ដឹកដីមិនគ្រប ដែលជាហេតុធ្វើឲ្យប៉ះពាល់ដល់ បរិស្ថានសណ្ដាប់ធ្នាប់សាធារណៈ។

ជាលទ្ធផល៖ នៅថ្ងៃទី០១-០២ ខែមិថុនា ឆ្នាំ២០២១ កម្លាំងការិយាល័យជំនាញខេត្ត សហការជាមួយផ្នែកសណ្ដាប់ធ្នាប់ និងចរាចរណ៍ នៃអធិការដ្ឋាននគរបាលស្រុកស្អាង ចុះស្រាវជ្រាវ ត្រួតពិនិត្យ និងឃាត់រថយន្តបានចំនួន ១៩គ្រឿង ដកហូតស៊ីផ្លេខ្យល់ ៩ដើម នៅលើបណ្តោយផ្លូវជាតិលេខ២១ និងផ្លូវលេខ ១២១០ ស្ថិតនៅក្នុងឃុំស្អាងភ្នំ ស្រុកស្អាង ខេត្តកណ្ដាល ។ ដោយរថយន្តទាំងនោះ ត្រូវបានកម្លាំងជំនាញធ្វើការអប់រំ និងធ្វើកិច្ចសន្យាដល់អ្នកបើកបរដូចខាងក្រោម៖

ទី១-ចាប់ពីថ្ងៃនេះតទៅ ខ្ញុំបាទនិងគោរពតាមការអប់រំ ណែនាំ របស់សមត្ថកិច្ចដោយពេលដឹកជញ្ជូនខ្សាច់ ឬដី ខ្ញុំបាទនិងគ្របឲ្យបានត្រឹមត្រូវ មិនឲ្យហៀរជ្រុះ ឬហូរទឹកធ្លាក់មកលើផ្លូវឡើយ។

ទី២-ខ្ញុំបាទនិងបំពាក់ស្លាកលេខយាន មានឯកសារយាន មិនបើកបរលឿន មិនបើកវ៉ាជែង មិនស៊ីផ្លេនៅកន្លែងហាមស៊ីផ្លេ និងមិនប្រើប្រាស់ស៊ីផ្លេខ្យល់។

ទី៣-បើខ្ញុំបាទមិនគោរពតាមកិច្ចសន្យាខាងលើ ខ្ញុំបាទនឹងទទួលខុសត្រូវទាំងស្រុងចំពោះមុខច្បាប់ ដោយឥតប្រកែកតវ៉ាឡើយ។

ដោយឡែក៖ ជំនាញផាកពិន័យរថយន្តចំនួន៧គ្រឿង៖
-ផ្ទុកសំពីងសំពោង ១គ្រឿង
-មិនពាក់ខ្សែក្រវ៉ាត់ ៦គ្រឿង
-ស្មើទឹកប្រាក់ចំនួន ១,២០០,០០០រៀល។

អាស្រ័យហេតុនេះ សូមសាធារណជន ដែលប្រើប្រាស់បណ្តាញទំនាក់ទំនងសង្គមមេត្តាជ្រាបជាព័ត៌មាន និងចូលរួមគោរពច្បាប់ចរាចរណ៍ផ្លូវគោកជាធរមាន៕