លោក អឿន សុធាលី អភិបាលរង ស្រុកកងមាស កំពុងបើកដៃឲ្យគ្រឿងចក្រកាយដីបឹង និង ព្យាយាមលាក់បាំង ខណៈប្រជាពលរដ្ឋទាមទារឲ្យបង្ហាញការពិត

ខេត្តកំពង់ចាម៖ គ្រឿងចក្រនិងរថយន្តកែឆ្នៃ ជាច្រើនគ្រឿង បានកំពុងធ្វើសកម្មភាពជីកកាយដីបឹង (បឹងតូច) យកអាចម៍ដី លក់យ៉ាងអាណាធិបតេយ្យ ស្ថិតនៅឃុំអង្គរបាន ស្រុកកងមាស ខេត្តកំពង់ចាម។

ករណីនេះប្រជាពលរដ្ឋនិយាយថា៖ អាជ្ញាធរស្រុកកងមាស និងមន្ត្រីមូលដ្ឋាន ឃុបខិតគ្នា កុហកប្រជាពលរដ្ឋ ឲ្យប្រជាពលរដ្ឋផ្តិតមេដៃស្តាបឹងយកទឹកប្រើប្រាស់!

ប៉ុន្តែផ្ទុយទៅវិញបែររួមគំនិតគ្នាជាមួយក្រុមគ្រឿងចក្រ និងបានបើកដៃឲ្យឈ្មួញយកគ្រឿងចក្រ លួចជីកកាយដីបឹងយកលក់តាមទំនើងចិត្ត ដោយគ្មានច្បាប់អនុញ្ញាតត្រឹមត្រូវនោះទេ។

ប្រជាពលរដ្ឋបានបន្តទៀតថា៖ គ្រឿងចក្រនេះកំពុងជីកកាយដីបឹង អាចជាបន្តកាយផ្តាច់ទាំងផ្លូវសាធារណៈ និងកំពុងធ្វើឱ្យតំបន់នេះ ប្រឈមការបាក់ស្រុត នៅថ្ងៃខាងមុខជាក់ជាមិនខាន!! ចំណែកឯអាជ្ញាធរ មិនគិតពីបញ្ហាទាំងនេះនោះទេ គឺមានតែគំរាមប្រជាពលរដ្ឋមិនឲ្យប្រជាពលរដ្ឋធ្វើការតវ៉ា។

ទាក់ទិនទៅនិងបញ្ហានេះ អភិបាលរង ស្រុកកងមាស លោក អឿន សុធាលី កាលពីថ្ងៃទី៣០ឧសភា បានបំភ្លឺជាមួយអ្នកសារព័ត៌មានថា៖ គ្រឿងចក្រកាយដីបឹង នេះ គឺមាន លិខិតអនុញ្ញាត ពី រដ្ឋបាលខេត្តកំពង់ចាម និងមានច្បាប់អនុញ្ញាតត្រឹមត្រូវពីស្ថាប័នជំនាញពាក់ព័ន្ធ និងបានបង់លុយពន្ធចូលរដ្ឋ!! ខណៈលោក មេឃុំ អង្គបាន បានបញ្ជាក់ប្រាប់សារព័ត៌មានថា គ្រឿងចក្រកាយដីបឹងនេះ គ្មានច្បាប់ អនុញ្ញាតចេញពីរដ្ឋបាលខេត្ត នោះទេ (ពោលគឺលោកមេឃុំអត់ដឹង)។

ការលើកឡើងពីសំណាក់លោក អឿន សុធាលី អភិបាលរង ស្រុកកងមាស រូបនេះ វាហាក់កំពុងតែដើរផ្ទុយពីផ្លូវច្បាប់ទាំងស្រុង និងហាក់ដូចជាកំពុងចូលរួមឃុបឃិតយ៉ាងសកម្មជាមួយឈ្មួញទុច្ចរិត ដោយព្យាយាមបិទបាំងការពិត!! ព្រោះការបំភ្លឺជាមួយអ្នកសារព័ត៌មាន លោក អឿន សុធាលី បាននិយាយថាមានច្បាប់អនុញ្ញាតត្រឹមត្រូវ! ប៉ុន្តែលោក អឿន សុធាលី រូបនេះ មិនហ៊ានបង្ហាញលិខិតអនុញ្ញាតជាសាធារណៈមកកាន់អ្នកសារព័ត៌មាន ឬ បង្ហាញឲ្យប្រជាពលរដ្ឋបានដឹងបានឃើញនោះទេ!! ជាពិសេស លោក អឿន សុធាលី និងម្ចាស់គ្រឿងចក្រ មិនហ៊ានបិទបង្ហាញជាសាធារណៈ អំពីគម្រោងស្តារបឹង ដើម្បីបើកបង្ហាញជាសាធារណៈអំពីគម្រោង ឲ្យប្រជាពលរដ្ឋដែលជាម្ចាស់ប្រទេសបានដឹង!!

ប្រជាពលរដ្ឋបន្ថែមបន្តទៀតថា៖ ការមិនហ៊ានបង្ហាញច្បាប់ ជាសាធារណៈ ស្មើរនឹងអំពើបិទបាំង ឃុបឃិតគ្នាជាមួយឈ្មួញទុច្ចរិត ដើម្បីប្រព្រឹត្តអំពើពុករលួយជីកដីបឹងរបស់រដ្ឋ យកអាចម៍ដីលក់យកលុយដាក់ហោប៉ៅផ្ទាល់ខ្លួន។

ករណីខាងលើនេះប្រជាពលរដ្ឋជាច្រើននៅតែបន្តទាមទារឲ្យរដ្ឋបាលខេត្តកំពង់ចាម រួមទាំង មន្ទីរធនធានទឹកនិងឧតុនិយម ខេត្តកំពង់ចាម ចាត់មន្ត្រីជំនាញចុះអន្តរាគមន៍ទប់ស្កាត់បញ្ហានេះជាបន្ទាន់៕