មន្ទីរព័ត៌មានខេត្តកំពង់ចាម បើកកិច្ចប្រជុំតម្រង់ទិសការងារព័ត៌មានសាធារណមតិ និងការប្រឆាំងព័ត៌មានក្លែងក្លាយ ជំហានទី២

កំពង់ចាម៖ មន្ទីរព័ត៌មានខេត្តកំពង់ចាម នាព្រឹកថ្ងៃទី០៥ ខែមិថុនា ឆ្នាំ២០២៦ បានរៀបចំកិច្ចប្រជុំតម្រង់ទិសស្តីពី «ការងារព័ត៌មានសាធារណមតិ និងការអនុវត្តយុទ្ធនាការនិយាយថាទេចំពោះព័ត៌មានក្លែងក្លាយ (Say No to Fake News) ជំហានទី២» ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន និង ឯកឧត្តម ជា ក្រូច អនុរដ្ឋលេខាធិការក្រសួងព័ត៌មាន ព្រមទាំងមានការអញ្ជើញចូលរួមពីថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យា នៃមន្ទីរព័ត៌មានខេត្តកំពង់ចាមជាច្រើននាក់។

កិច្ចប្រជុំនេះរៀបចំឡើងក្នុងគោលបំណងពង្រឹងសមត្ថភាពមន្ត្រីព័ត៌មាន និងអ្នកសារព័ត៌មានក្នុងការតាមដាន គ្រប់គ្រងសភាពការណ៍ព័ត៌មានសាធារណមតិ និងរួមគ្នាទប់ស្កាត់ការរីករាលដាលនៃព័ត៌មានក្លែងក្លាយ ដែលអាចបង្កឱ្យមានភាពវឹកវរ និងប៉ះពាល់ដល់សន្តិសុខសង្គម។ 

ឯកឧត្តម ទេព អស្នារិទ្ធ អ្នកនាំពាក្យក្រសួងព័ត៌មាន បានជំរុញឱ្យមន្ត្រីព័ត៌មានខេត្តកំពង់ចាម ក្តាប់រាល់ព័ត៌មាន និងប្រតិកម្មនានារបស់ប្រជាពលរដ្ឋក្នុងមូលដ្ឋាន ដើម្បីឆ្លើយតប និងផ្តល់ព័ត៌មានពិតបានទាន់ពេលវេលា និងបន្តផ្សព្វផ្សាយ និងអប់រំដល់សាធារណជនឱ្យយល់ដឹងពីផលប៉ះពាល់ នៃព័ត៌មានក្លែងក្លាយ និងរបៀបផ្ទៀងផ្ទាត់ព័ត៌មានមុននឹងជឿ ឬចែករំលែក (Share)។ លើសពីនេះអ្នកនាំពាក្យក្រសួងព័ត៌មាន បានសង្កត់ធ្ងន់លើតួនាទីភារកិច្ចរបស់អ្នកសារព័ត៌មាន ក្នុងការផ្សាយព័ត៌មានដែលប្រកបដោយតុល្យភាព វិជ្ជាជីវៈ និងការទទួលខុសត្រូវខ្ពស់។

នាឱកាសនោះដែរ ឯកឧត្តម ជា ក្រូច អនុរដ្ឋលេខាធិការក្រសួងព័ត៌មាន បានថ្លែងថា ការងារព័ត៌មាន និងសាធារណមតិ គឺជាយន្តការស្នូលរបស់រាជរដ្ឋាភិបាលកម្ពុជាក្នុងការគ្រប់គ្រងព័ត៌មានឌីជីថល ប្រមូលមតិយោបល់ និងផ្សព្វផ្សាយគោលនយោបាយនានាទៅកាន់ប្រជាពលរដ្ឋ។ យន្តការនេះដើរតួនាទីយ៉ាងសំខាន់ក្នុងការ ទប់ស្កាត់ និងបន្សាបព័ត៌មានក្លែងក្លាយ ព្រមទាំងបង្កើនការជឿទុកចិត្តរបស់សាធារណជនមកលើរដ្ឋបាលសាធារណៈ។

បើតាម លោកស្រី សម ផល្លា ប្រធាមន្ទីរព័ត៌មានខេត្តកំពង់ចាម បានឲ្យដឹងថា មន្ទីរព័ត៌មានបានធ្វើការសម្របសម្រួល ពាក់ព័ន្ធនឹងការអនុវត្តវិជ្ជាជីវៈរបស់អ្នកសារព័ត៌មានបានចំនួន០៥ ករណី និងបានបញ្ជូនទៅក្រសួងព័ត៌មានចំនួន៣ករណី ដើម្បីធ្វើការអប់រំណែនាំ តម្រង់ទិសលើវិជ្ជាជីវៈ ក្រមសីសធម៌ ដោយឈរលើធម្មនុញ្ញវិជ្ជាជីវៈសារព័ត៌មានជាគោល។ ក្នុងរយះពេល ៥ខែ ឆ្នាំ២០២៦ មន្ទីរព័ត៌មានបានធ្វើការសម្របសម្រួល ពាក់ព័ន្ធនឹងការអនុវត្តវិជ្ជាជីវៈរបស់អ្នកសារព័ត៌មានបានចំនួន០១ ករណី និងបានបញ្ជូនទៅក្រសួងព័ត៌មានចំនួន០២ករណី៕