មន្ត្រីពេទ្យសត្វ កាក់ឃាត់រថយន្ត ដឹកគោក្របី ជំរិតទារលុយ ពីអាជីវករ យ៉ាងសកម្ម ក្នុងភូមិសាស្ត្រខេត្តកំពង់ចាម

ខេត្តកំពង់ចាម៖ ក្រុមមន្ត្រីពេទ្យសត្វ នៃមន្ទីរកសិកម្ម រុក្ខាប្រមាញ់និងនេសាទ ខេត្តកំពង់ចាម ចំំណុះឲ្យក្រសួងកសិកម្មរុក្ខាប្រមាញ់និងនេសាទកម្ពុជា

ដែលល្បីថាចាក់ឬសគល់ឈរជើងយ៉ាងមាំ នៅចំណុចថ្នល់កែង ស្រុកបាធាយ ខេត្តកំពង់ចាម
បានកំពុងធ្វើសកម្មភាព កាក់រថយន្តដឹកគោក្របី របស់ប្រជាពលរដ្ឋ ត្រង់ចំណុចមុខវត្តស្តៅលើ ឃុំស្តៅ ស្រុកកងមាស ខេត្តកំពង់ចាម ដើម្បីជំរិតយកលុយពីអាជីវករ។ នេះបើយោងតាមការលើឡើងពីអាជីវករ។

ប្រភពព័ត៌មានពីអាជីវករបានឲ្យដឹងថា ក្រុមមន្ត្រីពេទ្យសត្វទាំងនេះ ជិះរថយន្ត Ford ព័ណ៌ខ្មៅ ពាក់ស្លាកលេខ ភ្នំពេញ៖ 2BJ-9995 បើកចល័តគ្រប់កន្លែង ក្នុងភូមិសាស្ត្រស្រុកបាធាយ និងស្រុកកងមាស ដើម្បីកាក់ឃាត់រថយន្តដឹកគោក្របីរបស់ប្រជាពលរដ្ឋ ដែលជាអាជីវករ និងបានជំរិតទារលុយ ពីម្ចាស់គោក្របី ១មុឺនរៀល ទៅ ២មុឺនរៀល សម្រាប់គោក្របី ១ក្បាល។

អាជីវករបានត្អូញត្អែរប្រាប់សារព័ត៌មានថា ក្នុង ១ឡានៗ ត្រូវចំណាយលុយឲ្យក្រុមមន្ត្រីពេទ្យសត្វទាំងនេះ ៧មុឺនរៀល ទៅ ៨ មុឺនរៀល ឬចំណាយលុយលើសពីនេះទៀត ប្រសិនបើចំនួនសត្វគោ មានចំនួនច្រើនរហូតដល់១០ ទៅ១២ក្បាល ត្រូវចំណាយ ១០មុឺន ទៅ១២មុឺនរៀល ជាកំហិត។

ក្រៅពីកាក់រថយន្ត ជំរិតទារលុយ ក្រុមទាំងអស់នេះ បានធ្វើសកម្មភាពឆាតឬខល តាមទូរស័ព្ទដើម្បីសុំលុយបន្ថែមទៀត។
ប្រសិនបើអាជីវករ មិនព្រមឲ្យលុយតាមអំណត់ ពួកមន្ត្រីពេទ្យសត្វទាំងនោះ និងចាប់យករថយន្ត យកទាំងឡានយកទាំងសត្វគោ បញ្ជូនទៅការិយាល័យ របស់ពួកគេ ដើម្បីកសាងសំណុំរឿង ចោទប្រកាន់ពីនេះពីនោះតាមតែអំពើចិត្ត។

អាជីវករបន្តត្អូញត្អែរទៀតថា រាល់ថ្ងៃរកស៊ី មិនសូវចំណេញទេ ព្រោះត្រូវបង់ថ្លៃចំណាយ ឲ្យក្រុមមន្ត្រីទាំងនោះ ប្រសិនបើពួកខ្លួនមិនបង់លុយឲ្យទេ ខ្លាចក្រុមនេះ ធ្វើទុក្ខបុកម្នេញ មិនឲ្យរកស៊ីបាន ដូចនេះមានតែបង្ខំចិត្តបង់លុយ ទាំងអួលដើមក។

ពាក់ព័ន្ធករណីនេះក្រុមការងារសារព័ត៌មានយើងមិនអាចសុំការបកស្រាយបំភ្លឺ ពីលោក ស៊ីម ថាវីរះ ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ចាម បាននោះទេ ដោយសារលេខទូរស័ព្ទ 012811781ខលចូលជាច្រើនដងគ្មានអ្នកទទួល។

ប្រជាពលរដ្ឋជាអាជីវករ បានធ្វើការប្រៀបធៀបសកម្មភាពរបស់ក្រុមមន្ត្រីពេទ្យសត្វទាំងនោះ ប្រៀបដូចជាក្រុមចោរប្លន់ និងបានកំពុងបង្កការភ័យខ្លាចយ៉ាងខ្លាំងដល់ពួកខ្លួនជាអាជីវករ ថែមទាំងបានបង្កឱ្យមានភាពអសន្តិសុខក្នុងសង្គម ប៉ះពាល់យ៉ាងខ្លាំងដល់គោលនយោបាយដឹកនាំរបស់ រាជរដ្ឋាភិបាលកម្ពុជា ដែលមានសម្តេច ហ៊ុន ម៉ាណែត ជានាយករដ្ឋមន្ត្រី។

ទាក់ទិនទៅនិងករណីនេះប្រជាពលរដ្ឋទាមទារឱ្យលោក ស៊ីម ថាវីរះ ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ចាម ត្រូវតែធ្វើការទទួលខុសត្រូវជាដាច់ខាតចំពោះទង្វើមន្ត្រីរបស់ខ្លួន និងស្នើសុំយ៉ាងទទូចដល់ ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ សូមចាត់វិធានការចំពោះមន្ត្រីពេទ្យសត្វ ដែលបានធ្វើសកម្មភាពល្មើសច្បាប់ខាងលើនេះផង៕

អត្ថបទ៖ ម្ចាស់ជំរុំ អក្សរ ន៚
រូបភាព និងវីដេអូ៖ ប្រជាពលរដ្ឋ